Belsana. Primera revista na redi alreol de l'estremeñu

El traduciol, Antoniu Garríu Correas, mos cuenta
el su luchi personal pa imprental el libru:
"Se me jue rejuyíu cualquiel intentu de publicación con alegatus indignantis pa mi i la nuestra cultura"

Angunas escuelas de la provincia de Cazris an nombráu libru de letura El Prencipinu na su versión estremeña. Sólu son unas pocas peru es tou un trunfu p'Antoniu Garríu Correas, el traduciol d'esta obra d’Antoine de Saint-Exupéry reconecía universalmenti. Garríu, natural de la Vera, tuvu que vaqueal duranti ochu añus pa conseguil vel imprentáu esti libru, que a siu la notícia del final del sigru XX alreol de la galra estremeña. Pidió ayúa oficial, pidió colaboración a las istitucionis culturalis, a bancus, a cahas d’aorrus... peru deci el prencipiu nu quisun ponel dineru nel proyetu.

De momentu, s’an imprentáu 1.000 librus, que contienin los santus dibuháus pol Saint-Exupéry na edición francesa orihinal. Antoniu Correas a confesáu que, a parti d'estendel los valoris éticus d’El Prencipinu, se trata d’aprovechal la fama del libru pa dal una mihina d’arrempuhón a l’estremeñu. N’esta entrevista, mos muestra que es un hombri sensibli, con una concencia cabal, a pesal de los descalientus que a teníu deci nuevinu cola cuestión de la lengua. El rechazu a El Prencipinu nu hué, comu veremus, la primera ofensa sufría.

Afecháu el mapa lingüísticu d'Estremaúra
La UEX tiei previstu sacalu a la calli caicuandu

El mapa lingüísticu d’España queará acabáu oguañu cuandu el Departamentu de Filolohía Espánica de la Universidá d’Estremaúra (UEX) imprenti el correspondienti a la nuestra rehión. El trabahu hue aprobáu esti otoñu pasáu i saldrá caicuandu a la calli. Agora está na fasi d’edición. Se trata d’un tratáu con mas de 800 mapas, que arrrecohin los distintus caraitis de las galras estremeñas. Pa ellu s'an recorríu 60 pueblus. La intención es que, nel futuru, el mapa ayui i sirva de referencia a otrus estuyus.

L'asturianu ya tiei dicionariu normativu
Sostribáu pol Palramentu del Principáu

L’Academia de la Llingua Asturiana a acabáu el procesu de normativización lingüística con l'edición del primel dicionariu normativu del babli. Se trata d’una obra soberbia, con 1.330 cuartillas imprentás i 50.000 palabras.

...........................................................

"A fala", bien d'interés cultural estremeñu

Reconecimientu de la Junta a la galra de Xálima

El día 20 de marzu, la Junta d'Estremaúra declaró "bien d'interés cultural" la galra de Sa Martín de Trevellu, As Ellas i Valverdi. Na declaración el gobiernu rehional se comprometi a defendel la lengua. Peru nengún compromisu sobri la su difusión.

Orgullosus de la
nuestra palra
José Benito Mateos

Causas pa que la nuestra lengua esté arreculandu hai muchas. Una d'ellas es política: a lus nuestrus gobiernamientus nu les interesa qu'haiga más lenguas porque esu significa reconocel la identidá de más pueblus, perdiendu asina parti del su podel. Estu es gravi en la Comunidá de Castilla y León, andi sólu están reconocíus y protegíus el castellanu y ¡el gallegu!, dejandu d'un láu las palras leonesas de León, Zamora y Salamanca, en un intentu d'anulal la identidá del pueblu leonés, en queriendu castellanizal a tres provincias que siempri juerun leonesas.